ජාතික ව්‍යාපාරයේ විවිධ ධාරාවන්

මගේ ජීවිත කාලය තුළ මා හට අත් දකින්නට ලැබුණු සිංහල ජාතික ව්‍යාපාරයේ ධාරාවන් කිහිපයක්:
 
පළමු ධාරාව: මේ ධාරාවට අයත් පුද්ගලයන් වන්නේ දෙමළ බෙදුම්වාදී කොටි ත්‍රස්තවාදයේ මුල් සමයේ පටන් ඊට විරුද්ධව ක්‍රියා කරන ලද ක්‍රියාධරයන් සමූහයකිනි. මොවුන් වැඩි පිරිස බෞද්ධකම ගැන හෝ සිංහල සංස්කෘතිය පිළිබඳ වැඩි අවධාරණයක් යොමු නොකරති. මොවුන්ගේ වැඩි අවධාරණය යොමු වී ඇත්තේ දෙමළ බෙදුම්වාදයේ මතවාදී පෙරමුණට එරෙහි වීම පිළිබඳව සහ විවිධ දෙස්/විදෙස් දේශපාලනය ගම්‍යතාවන් පිළිබඳවයි. එස්.එල්. ගුණසේකර මහතාගේ පන්නයේ පුද්ගලයන්ය. ද්වි භාෂා උගතුන් වන මේ පිරිසෙන් ඇතැමෙක් ලංකාවෙන් පිට ජීවත් වෙති. බොහෝ දෙනෙක් වෘද්ධය. ලංකා වෙබ් නැමැති වෙබ් අඩවිය වටා මේ පිරිසේ බොහෝ දෙනෙක් රොක් වී සිටිති.
 
දෙවන ධාරාව: නලින් ද සිල්වා මහතාගේ අදහස්, ඔහුගේ චින්තන පර්ෂදය ආශ්‍රිතව ගොඩ නැගුණු විවිධ පිරිස් ය. සමහරක් විවිධ හේතු නිසා ඒ ආශ්‍රයෙන් ඉවත් වී ගිය අය වුවද ඔවුන් ස්ථාන ගත වෙන්නේද මේ ධාරාව තුළමයි. බොහෝ දෙනෙක් උසස්පෙළ ගණිත විෂය හදාළ උගතුන් අතර ඉනුත් විශේෂයෙන් මොරටුව විශ්ව විද්‍යාලයේ ඉංජිනේරු උපාධිය ලත් පිරිසකි. දර්ශනය, ආගම වැනි මාතෘකා ගැන මතවාද වලට ප්‍රියය. වැඩි අවධාරණය ඇත්තේ බටහිර නූතනත්වයට එරෙහිවයි. ඊට අමතරව සිංහල සංස්කෘතිය, ඉතිහාසය, බුදුදහම පිළිබඳ වැඩි උනන්දුවක් දක්වති. මුස්ලිම් අන්තවාදය සහ ව්‍යාප්තවාදය ගැන වැඩි අවධාරණයක් යොමු නොකරති.
 
තුන්වන ධාරාව: මේ පිරිස වාමාංශිකත්වයෙන් ජාතිකත්වයට නැඹුරු වූ පිරිසකි. වැඩි අවධාරණය ඇත්තේ ඇමෙරිකන් / බටහිර අධිරාජ්‍යවාදයට විරුද්ධවයි. තත්කාලීන දේශපාලන කාරණා ගැන වැඩි උනන්දුවක් දක්වති. බොහෝ දෙනෙක් සිංහල සංස්කෘතිය හෝ බෞද්ධ සංරචකය ගැන තදබල අවධාරණයක් කරන්නේ නැත. දෙමළ බෙදුම්වාදය ගැන උනන්දු අතර මුස්ලිම් ව්‍යාප්තවාදය ගැන උනන්දු නැත. යූඇන්පී විරෝධය ප්‍රධාන ලක්ෂණයකි. සමහරෙක් තුළ අර්ධ වාමාංශික අදහස් ද ඇත. ගුණදාස අමරසේකර, විමල් වීරවංශ, ජාතික නිදහස් පෙරමුණ, දේශ හිතෛෂී ජාතික ව්‍යාපාරය ආශ්‍රිතව මේ පිරිස දැක ගත හැක.
 
හතවරන ධාරාව: මේ පිරිස මතවාදී කාරණා, අදහස්, ලිපි, සම්මන්ත්‍රණ, සංවාද ගැන උනන්දුවක් නොදක්වන අතර උද්ඝෝෂණ, සටන්, පෙළපාලි වැනි ප්‍රායෝගික ක්‍රියාකාරකම් කෙරෙහි වැඩි උනන්දුවක් දක්වති. වැඩි අවධාරණයක් යොමු කරන්නේ මුස්ලිම් අන්තවාදය සහ ව්‍යාප්තවාදයට එරෙහිවයි. දේශපාලනය ගැන වැඩි උනන්දුවක් නොදක්වති. ඇතමෙක් තුළ වර්ගවාදී ලක්ෂණද දක්නට ඇත. බොදු බල සේනා, සිංහල රාවය, සිංහලේ ව්‍යාපාරය වැනි සංවිධාන ඒවායේ භික්ෂූන් වහන්සේ ආශ්‍රය කර ගෙන මේ පිරිස දැක ගත හැක.
 
පස්වන ධාරාව: මේ පිරිස උගත් සහ නාගරික ප්‍රභවයන්ගෙන් පැවතෙන පිරිසකි. මේ පිරිස විශේෂයෙන් දෙමළ බෙදුම්වාදය සම්බන්ධව වන බටහිර දේශපාලන මැදිහත් වීම්වලට එරෙහි වුවත් බටහිර නූතනත්වය පිළිබඳ දැඩි විරෝධයක් නැත. සිංහල සංස්කෘතියට නොගැලපෙන ඇතැම් කාරණා කීපයක් හැරෙන්නට ඔවුහු බටහිර මාදිලියේ සංවර්ධනයක් පිළිබඳ විශ්වාස කරති. මුස්ලිම් අන්තවාදය සහ ව්‍යාප්තවාදය පිළිබඳ දැඩි අවධාරණයක් යොමු කරති. ඊට අමතරව බෞද්ධකම සහ දෙමළ බෙදුම්වාදය පිළිබඳවද අවධාරණයක් යොමු කරති. ආර්ථික කාරණා ගැන වැඩි උනන්දුවක් දක්වති. සිංහලයාගේ වෙළඳ දියුණුව ගැන විශේෂයෙන් සලකති. මුස්ලිම් ව්‍යාප්තවාදයට එරෙහි විශේෂ අවධාරණයක් යොමු කිරීමට එයද හේතුවකි. දැඩි මාක්ස්වාදි විරෝධීහුය. සමහරෙක් තුළ කොළ පාට විඥාණයක් පිහිටයි. ජාතික හෙළ උරුමය, ත්‍රස්ත විරෝධී ජාතික ව්‍යාපාරය, සිංහල වීරවිදහන වැනි සංවිධාන ආශ්‍රය කොට ගෙන මේ පිරිස වැඩි දෙනෙක් දැක ගත හැක.
Advertisements

බැසිල්ගේ ආගමනය

ඡන්දයක් ගැන සිතා බැලීමේදී නම් බැසිල් රාජපක්ෂ සිටියත් නැතත්, තව වසර කිහිපයකින් පැවතෙන මැතිවරණයකින් හෝ ජනාධිපතිවරණයකින් මේ ආණ්ඩුව පරාජය කළ හැකි බව මගේ තක්සේරුවයි. 2005 ජනාධිපතිවරණය දී මහින්ද රාජපක්ෂ ජයග්‍රහණය කළේ පක්ෂ නායිකාව විසින් පක්ෂය අකර්මණ්‍ය කොට තිබියදී, සියලුම මාධ්‍ය ඔහුට එරෙහිව තිබියදී හුදෙක්ම විමල් වීරවංශගේ සහ ජාතික ව්‍යාපාරයේ සහායෙන් පමණි. මෙහිදී යමෙකුට තර්ක කළ හැකියි මහින්ද ගේ ජයග්‍රහණයට උතුරේ ඡන්ද වර්ජනය උදවු වූ බවට. නමුත් මේ ආණ්ඩුව මීළඟ පැවැත්වෙන ඡන්දයකට යන්නේ තවත් අපකීර්තියට පත්වූ පසුව බව අමතක නොකළ යුතුයි. බොහෝ ආණ්ඩු කල් යාමේදී ජන අප්‍රසාදයට මිස ජනප්‍රසාදයට පත් නොවේ. නමුත් මේ ආණ්ඩුව මොනම පැත්තකින්වත් සාධනීය දෙයක් රටට හෝ රටවැසියාට කරන්නෙ නැති නිසා මේ ආණ්ඩුව ඉදිරියේදී වඩ වඩාත් ජන අප්‍රසාදය පත් වන බව කල්පනා කළ හැකියි. විශේෂයෙන් එට්කා ගිවිසුම හරහා ඉන්දීය ශ්‍රමිකයන් මෙරටට පැමිණීම ආරම්භය සිදු වුවහොත්, පක්ෂ භේදයකින් තොරව, විශේෂයෙන් උගත් බුද්ධිමත් මධ්‍යස්ථ ජනතාවත් මේ ආණ්ඩුවට එරෙහි වෙන්න කටයුතු කරන බවට සැකයකින් තොරව අපට කල්පනා කළ හැකියි. මේ නිසා ඊළඟ ඡන්දයකදී මහින්ද කඳවුර ඉන්නේ 2005 ට වඩා වාසි සහගත තැනක ය.

මහින්ද කඳවුර මීළඟ ඡන්දයට යන්නේ ශ්‍රිලනිපය හරහා නොවන බව පැහැදිලියි. ඒ නිසා අලුත් පක්ෂයක් හෝ පෙරමුණක් ඡන්දයකදී සංවිධානය කිරීම අනිවාර්ය අවශ්‍යතාවක්. විමල්, ගම්මන්පිල, දිනේෂ්, වාසු ඇතුළු පිරිස අලුත් පෙරමුණේ වේදිකාවේ ඉදිරියෙන් සිටියත්, අලුහ් පෙරමුණේ දේහය වෙන්නේ ශ්‍රිලනිප ප්‍රාදේශීය නායකයන් බව සැලකිය යුහ්ටුය. මේ පිරිස ඡන්දයක් සඳහා සංවිධානය කිරීමට නායකත්වයක් අවශ්‍ය වේ. ඒ කාර්යය විමල්, ගම්මන්පිල හෝ දිනෙෂ්ට කළ හැකි දෙයක් නොවේ. කුමාර වෙල්ගම සහ ප්‍රසන්න රණතුංග ඒ සඳහා වඩා සුදුසු පුද්ගලයන් දෙදෙනෙකි. ඒ දෙදෙනාම විශ්වාසදායක අය වෙති. නමුත් ප්‍රසන්න රණතුංග එතරම් පරිණත කෙනෙක් නොවීමත්, කුමාර වෙල්ගමගේ කට හොඳ නැති වීමත් අවාසි ලෙස බලපායි. බැසිල් මේ කාර්යය ඔවුන් දෙදෙනාටම වඩා හොඳින් කළ හැකි බව පැහැදිලියි. නමුත් බැසිල් පිළිබඳව ශ්‍රිලනිප ප්‍රාදේශීය නායකයන්ගේ වර්තමාන ආකල්පය කුමක්ද? මට මේ පිළිබඳ අවබෝධයක් නැත.

2015 ජනාධිපතිවරණය මෙහෙය වූයේ බැසිල් රාජපක්ෂ බව අප අමතක කළ යුතු නැත . 2015 පරාජයට මූලික හේතුව බැසිල් බව විමල් සහ ගම්මන්පිල වැනි නායායෝ ඡන්දය අවසන් වූ වහාම ප්‍රසිද්ධියේම ප්‍රකාශ කළහ. මගේ වැටහීම නම් ශ්‍රිලනිප පරණ ජ්‍යෙෂ්ඨයන් මහින්දව අතහැරීමට බැසිල්ගේ ක්‍රියා කලාපයන් බලපෑ බවයි. මා කියන්නේ රාජිත, එස්.බී. වැනි අවස්ථාවාදීන් ගැන නොවේ; අනුර ප්‍රියදර්ශන, සුසිල් ප්‍රේමජයන්ත යාපා වැනි ශ්‍රිලනිප ජ්‍යෙෂ්ඨයන් ගැනයි. එමෙන්ම දැනට මහින්ද කඳවුරේ ඉන්න ප්‍රබලයන් වන විමල්, ගම්මන්පිල, වාසු, ඩලස්, මහින්දානන්ද වැනි අයත් බැසිල් පිළෛබඳ ප්‍රසාදයකින් පසුවන අය නොවෙති. එයත් අවාසි සහගතය. විමල් බැසිල් පිළිබඳ තම අප්‍රසාදය මෑතකදී ප්‍රසිද්ධියේම ප්‍රකාශයට පත් කළේය.

ඡන්දයක් සඳහා මුස්ලිම් සහ දෙමළ වාර්ගික දේශපාලනය හොඳින්ම ආමන්ත්‍රණය කිරීමේ හැකියාව ඇති පුද්ගලයා බැසිල් බව පිළිගත යුතුය. නමුත් ඡන්දයකදී එය වාසි සහගත වුනත් ඉන් පසු එය ජාතිකත්වයට හෝ රටට අවාසි සහගත ලෙස මිස වාසි සහගත ලෙස බල නොපායි. දෙමළ හෝ මුස්ලිම් වාර්ගික ඡන්ද කුට්ටි ලබා ගත හැකි වන්නේ ඔවුන්ගේ වාර්ගවාදී දේශපාලන ඉල්ලීම් /දොළ පිදේණි වලට යටත්වයි. ඡන්දය දිනුවත් ඉන්පසුව ඔවුන් සමඟ වන ගනුදෙනුව වාසි සහගත එකක් නොවනු ඇත. ඒ අතරම පසුගිය කාලයේ බැසිල් සහ රිශාඩ් බදියුද්දීන් අතර තිබූ සම්බන්ධතාව අවසන් වූයේ රටටවත්, පක්ෂයටවත් අඩුම තරමේ බැසිල්ටවත් වාසිදායක නොවන ලෙස බවත් මතක් කළ යුතුයි.

ඡන්දයකට යාමට පෙර වර්තමාන ආණ්ඩුවේ ඉන්න පිරිසක් ගලවාගෙන මේ ආණ්ඩුව පෙරළන්න උත්සාහයක් තියෙනවා නම් (2001 මෙන්) ඒක කරන්න සුදුසුම පුද්ගලයා බැසිල් බව නම් අවිවාදාත්මකයි. ඒ නිසා එවැනි උපාය මාර්ගයක් සඳහා අවකාශයක් හ උනන්දුවක් ඇත්නම් ඒ සඳහා බැසිල් ගේ සහාය අත්‍යවශ්‍ය වේ.

මෙලෙස බැසිල් රාජපක්ෂ ගේ ආගමනයෙන් සිදුවන දේශපාලනමය වාසි අවාසි ගැන වෙනම සන්දර්භයක කතා කළ හැක. නමුත් බැසිල් රාජපක්ෂ ජාතිකවාදියෙක් ය කියමින් ඔහුගේ බිඳවැටුණ ප්‍රතිරූපය ව්‍යාජ ලෙස ගොඩ නංවන්න උත්සාහ කරනවා නම් ඒකට නම් විරුද්ධ විය යුතුයි.

බැසිල් රාජපක්ෂ ට පසුගිය ආණ්ඩු සමයේ විවිධ චෝදනා රාශියක් එල්ල විය. සෙසු රාජපක්ෂවරුන්ට මෙන් ඔහුට ද එල්ල වූ චෝදනා බොහොමයක් ප්‍රබන්ධ විය හැක. එසේ එල්ල වූ අභූත චෝදනාවලට පිළිතුරු දීම සහ එමඟින් තමන්ගේ හානි වූ ප්‍රතිරූපය සකසා ගැනීමට ඔහු කටයුතු කිරීම වරදක් නොවන අතර එය කළ යුතුම දෙයකි. නමුත් මැක්‍රෝලෙවල්, මයික්‍රෝලෙවල් ජාතිකත්වය , ආර්ථික ජාතිකත්වය වැනි බාල න්‍යායන් ගොඩ නඟමින් බැසිල් රාජපක්ෂ ජාතිකවාදියෙක් කිරීමේ උත්සාහයක් මෑතක සිට සිදුවෙමින් පවතින් බව පෙනේ. මහින්ද කඳවුරේ බුද්ධිමය පෙරමුණ සැකසී ඇත්තේ ජාතිකත්වය නම් සටන් පාඨයත් සමඟය. ඒ නිසා මහින්ද කඳවුරේ නායකත්වයක් යමෙක් අපේක්ෂා කරනවා නම් ජාතිකවාදියෙක්ය කියන සංකේත අර්ථය ඔහුට අනිවාර්ය සාධකයක් වී තිබේ. මේ හේතුව නිසා ඇතැම් පුද්ගලයන්ට බැසිල් රාජපක්ෂ ජාතිකවාදියෙක් කිරීමේ අවශ්‍යතාව මතුව තිබේ.

බැසිල් රාජපක්ෂ රනිල් හෝ සිරිසේනට වඩා දක්ෂ දේශපාලකයකු විය හැකියි. නමුත් ඔහු තුළ ජාතිකත්වයක් මට නම් පෙනෙන්නේ නැත. අවශ්‍ය නම් යමෙකුට බැසිල්ව ජාතිකත්වය තුළට ගෙන ඒමට උත්සාහ කළ හැකියි. නමුත් ඔහු කරන කියන හැම දේම ජාතිකත්වය බව පෙන්වීමට තියරි හැදීමට ඇතැම් න්‍යායාචාර්ය වරුන් කටයුතු කිරීම ජාතිකත්වය පැත්තෙන් විශාල හානියක් බව කිව යුතුයි.

basil_rajapakse_1.png

එක්ස් ෆයිල්ස් සහ පිටසක්වල ජීවී මනස්ගාත

එක්ස් ෆයිල්ස් (X-Files) නම් ජනප්‍රිය රූපවාහිනි නාට්‍ය මාලාවට අයත් නවතම නාට්‍ය මාලාවක් විකාශය වන බව ප්‍රචාරය වනු මට දැක ගත හැකි විය. මීට සමගාමීව පැරණි එක්ස් ෆයිල්ස් කතා මාලාවන් රූපවාහිනියේ විකාශය වන අතර ඉන් කතා එකක් දෙකක් නැරඹීමට මට ඉඩ ප්‍රස්ථාව ලැබිණි. මේ සමඟම මගේ මතකය ඇදී ගියේ අතීතය වෙතයි. එක්ස් ෆයිල්ස් මුලින්ම ලංකාවේ විකාශය වුනේ මා පාසල් යන අවධියේය. මුල්ම එක්ස් ෆයිල්ස් කතාව බැලීමෙන්ම අමන්දානන්දයට පත් වූ මම ඉන්පසු එහි සියළු කතා නොවරදවා නැරඹුවෙමි. කෙසේ නමුත් ඊයේ පෙරේදා නැවත පැරණි කතා එකක් දෙකක් බැලීමේදී පාසල් වියේදී මා අත්විඳි සංක්ෂෝභය මට නැවත ඇති වූයේ නැත. මේ බව මා සමඟ ඒ නැරඹූ මගේ බිරිඳ ද පැවසුවාය.

පාසල් වියේ මා එක්ස් ෆයිල්ස් වෙත ආකර්ෂණය වූයේ එහි කතාවල වඩවන කුතුහලය සහ රූප රචනාවල ඇති වෙනස නිසාය.  කවුරුත් දන්නා පරිදි එක්ස් ෆයිල්ස් කතා මාලාව ගෙතෙන්නේ ඇමෙරිකාවේ FBI නියෝජිතයන් දෙදෙනෙකු වන ෆොක්ස් මෝල්ඩර් (Fox Mulder) සහ ඩේනා ස්කලි (Dana Scully) අතරය. මොවුන් දෙදෙනාගේ සම්බන්ධයද සුවිශේෂය. ඔවුන් දෙදෙනා අතර දැඩි බැඳීමක් තිබුනද එය කිසි දිනක ප්‍රේම සම්බන්ධතාවක් දක්වා වර්ධනය නොවේ. ඔවුන් එකිනෙකා අමතන්නේද වාස ගමිනි.  ස්කලී සැම විටම බටහිර විද්‍යාවට (Science) අනුව විස්තර කළ හැකි දෑ පිළිබඳව විශ්වාසය තබන අතර, මෝල්ඩර් සැමවිටම පාරයථාවිධ (Paranormal) දේ පිළිබඳ විශ්වාසය තබන කෙනෙකි.

2

මොවුන් දෙදෙනාව ගවේෂණයන් සඳහා යොමු කෙරෙන්නේ අසාමාන්‍ය සිද්ධීන් ගවේෂණය සඳහාය. එය මහා වනාන්තරයකදී හමු වූ අද්භූත සත්වයෙක්, නිවෙස්වල මළ පද්ධතිවල ජීවත් වන ජාන විකෘතිතාවට ළක් වූ මිනිසෙක්, එසේත් නැතිනම් රාත්‍රි කාලයේ ලේ උරා බොන වැම්පයර් මිනිස් සමූහයක් ගැන විය හැකියි. පෙර කී පරිදි මෝල්ඩර් සහ ස්කලී මේ ගවේෂණයන් සඳහා යොමුවන ප්‍රවේශයන් එකිනෙකට වෙනස් වන අතර මෝල්ඩර් බොහෝ විට නිවැරදි මඟ ගනී. ඒ සඳහා ඔහුට සහජ ආශයක් ඇති බව නරඹන්නාට ඒත්තු යයි. කතා සියයක් පමණ ගෙවී ගියත්, නොයෙකුත් පාරයථාවිධ සිද්ධීන් අත් දුටුවත් ස්කලී සැම විටම කියන්නේ “Mulder, there is no scientific explanation for this…” කියාය. සුපුරුදු පරිදි මෝල්ඩර් ඊට එරෙහි මඟ යයි.

පාරයථාවිධ කතාවන් තේමාවන් කර ගන්නා නිසා එක්ස්ෆයිල්ස් තුළින් ඉන් බටහිර විද්‍යාවට අභියෝග වෙතැයි කෙනෙකුට හැඟී යා හැක. නමුත් සෑම කතාවක් මුලටම එහි යොදන “Truth is Out There” නම් පාඨයත් සමඟම අපෙන් බාහිරව පවතින වාස්තවික යථාර්තයත් ඒ හා සම්බන්ධ යුදෙව් ක්‍රිස්තියානි චින්තනයත් එක්ස් ෆයිල්ස් තුළින්ද මතු කෙරෙන බව අප වටහා ගත යුතුය.

කතා වැඩි ප්‍රමාණයක් රූ ගත කෙරෙන්නේ රාත්‍රි කාලයේ අඳුරේය.  කොතන ගියත්, මහ රෑ දොළහටත් මෝල්ඩර් සිටින්නේ ටයි, කෝට් පැළඳගෙනය. ස්කලීද කාර්යාලයකට සුදුසු ඇඳුමක් හැඳගෙනය. මහ රෑ ගණ අඳුරේ පාලු ගබඩා කාමරයට තනිවම ඇතුළු වන මෝල්ඩර්  එක් අතකින් පිස්තෝලයක් ගෙන, අනෙක් අතින් ටෝච් එක දල්වා ඇතුළත ඇති දෑ පිරික්සයි. ටෝච් එළිය අඳුරේ ඔබ මොබ චලනය වන අතර එක්වනම යමෙක් දඟලනු අපැහැදිලිව පෙනේ.  සිය හැඳුනුම්පත අතට ගන්නා මෝල්ඩර් “Federal agents…” යනුවෙන් කෑ ගසයි.  අඳුරේ දඟලන කෙනා පලා යනු පෙනේ. මෝල්ඩර් තමන්ගේ ජීවිතය පිළිබඳ කිසිදු ආසාවක් නැතිව ඒ කෙනා පසුපස ගණ අඳුරේ පන්නයි. මෙවන් ජවනිකා එක්ස් ෆයිල්ස් කතා මාලාවේ සුලබය.මෝල්ඩර් ගන්නා අවදානම්වල හැටියට, සැබෑ ලෝකයේ කෙනෙක් අවදානම් ගනී නම් ඔහු මේ වන විට පනස් වතාවක් වත් මිය ගොසිනි. මට මතක හැටියට මෝල්ඩර් එක් කතාවක මිය යයි. නමුත් රතු ඉන්දියානු මායාකරුවෝ පිරිසක් ඔහුට නැවත පණ දෙති.

ඒකාංගික කතා ලෙස විකාශය වුවත්, එක්ස් ෆයිල්ස් කතා මාලාවේ කතා සියල්ලම එකට බැඳෙන හුයක් තිබේ. ඒ කුමක්ද යත්: එක්සත් ජනපද රජයට සම්බන්ධ ඉහළ තනතුරු දරන පිරිසක් (Syndicate) සිටිති. ඔවුහු පිටසක්වලින් පැමිණෙන දියුණු ජීවින් (Aliens) පිරිසක් සමඟ සබඳතා පවත්වති. ඒ සබඳතා හරහා ඔවුහු විවිධ දියුණු තාක්ෂණික දේ අත් හදා බලති.  ඒවා සුපිරි ගුවන් යානා තාක්ෂණය, විවිධ ජෛවරසායනික අවි, මිනිස් ක්ලෝනීකරණය වැනි දේය. මේ සියල්ල ඔවුහු පොදු මහජනතාවගෙන් සඟවා රහස් ලෙස රකිති. මෝල්ඩර් සහ ස්කලී දෙදෙනාගේ ගවේෂණ වලදී ඔවුනට මේ රහස් වල අහු කොන් පෙනෙන අතර ඒ හේතුවෙන් යටකී පිරිස ඔවුන්ගේ කටයුතු වලට විවිධ බාධා පමුණුවති.  කොතරම් බාධා කළත් ඔවුහු මෝල්ඩර් සහ ස්කලී දෙදෙනාගේ ජීවිත වලට හානි නොකරන අතර (පහසුවෙන් එසේ කිරීමේ හැකියාව තිබියදී), එසේ නොකරන්නේ ඇයිද යන්නට සංගත හේතුවක් කිසි තැනක ඉදිරිපත් වනවා මට මතක නැත.

පාසල් යන වයසේ ඇල්මෙන් එක්ස් ෆයිල්ස් නැරඹූ මම පිටසක්වල ජීවීන් පිළිබඳ කතාව සත්‍යයක් ලෙස තදින් ග්‍රහණය කර ගතිමි. පිටසක්වල ජීවීන් පිළිබඳ කතා එක්ස් ෆයිල්ස් කතාමාලාවට පමණක් නොව බොහෝ හොලිවුඩ් නිර්මාණ වලට පාදක වෙයි. එලෙස එක්ස්ෆයිල්ස් මෙන්ම බොහෝ හොලිවුඩ් නිර්මාණවලට පාදකවන පිටසක්වල ජීවී කතාවල පොදු සාම්‍යයන් තිබේ:

1. දියුණු ශිෂ්ටාචාරයක සිට පැමිණෙන පිටසක්වල ජීවීන් ගේ හැඩරුව බොහෝ කතාවල එක හා සමානය. මිනිසුන්ට තරමක් සමාන ඔවුන්ට විශාල කෙස් නැති හිසක්, සිදුරු දෙක පමණක් වන නාසයක්, කුඩා කටක්, විශාල ඇස් යුගලයක් සහ කෙසඟ සිරුවක් හිමි වේ. තැන්පත් හැසිරීමක් ඇති ඔවුන් මිනිසුන් හා සන්නිවේදනය කරන්නේ ටෙලිපති ක්‍රමයටය.

2. මේ පිටසක්වල ජීවින් අභ්‍යවකාශ තරණය කරන්නේ පීරිසි හැඩය ගත් යානාවලය. ඔවුහු අහඹු ලෙස මිනිසුන් පැහැර ගන්නා අතර විවිධ පරීක්ෂණවලට ඔවුන්ට ලක් කර නැවත එවති. පැහැර ගැනීමට ලක් වූ කෙනාට ඉන්පසු බොහෝ දේ මතක නැත.

3.1947 දී ඇමෙරිකාවේ, නව මෙක්සිකෝවේ රොස්වෙල් ප්‍රදේශයට පිටසක්වල ජීවින් රැගත් යානාවක් කඩා වැටේ. එම යානයත්, එහි සිටි ප්‍රාණය සහිත පිටසක්වල ජීවීන් කිහිප දෙනෙකුත් එක්සත් ජනපද ගුවන් හමුදාව විසින් මුදා ගනු ලබයි. සිද්ධිය මහජනතාවගෙන් වසන් කරනු ලැබේ.

4 එක්සත් ජනපදයේ Area 51 නමින් හැඳින් වෙන කිසිදු කෙනෙකුට ඇතුළු විය නොහැකි ලෙස ආවරණය කෙරුණු ගුවන් හමුදාව විසින් පාලනය කෙරෙන ප්‍රදේශයක් වේ. මෙහි සිදු කරනු ලබන්නේ පිටසක්වල ජීවින්ගේ ආධාරයෙන් සුපිරි තාක්ෂණයෙන් යුතු ප්‍රහාරක ගුවන් යානා පර්යේෂණ කටයුතුය.

1.JPG

මේ කතා පිළිබඳව බටහිර රටවල, විශේෂයෙන් යෞවනයන්ගේ, දැඩි විශ්වාසයක් ගොඩ නැගී තිබේ. අපේ රටේද නාගරික සමාජයේ මේ කතා තදින් අල්ලා ගත් තරුණ පිරිසක් සිටින බව පෙනේ. ( අපේ සංස්කෘතියට අයත් දෙවියන්, භූතයන් වැනි ප්‍රාණීන් ගේ පැවැත්ම ප්‍රතික්ෂේප කරන ඇතැම්හු පිටසක්වල ජීවීන් ගේ පැවැත්ම තහවුරු කිරීමට තර්ක ඕන තරමක් ගෙන එති. ) මා ද තරුණ වියේදී දැඩිව මේවා විශ්වාස කළද, දැන් ආපසු හැරී බලන විට සිතෙන්නේ මේ සියල්ල කිසිදු සාධකයන් නැති හුදු මනස්ගාත බවයි.

එපමණක් නොව මේවා හුදු හොලිවුඩ් ප්‍රබන්ධම නොව ඊට එහ ගිය අරමුණක්ද මේ යටින් තිබෙනු ඇතැයි දැන් මට සිතේ. ඊනියා පිටසක්වල ජීවී මනස්ගාත හරහා එක්සත් ජනපදය ලෝකයේ අප වැනි සෙසු රටවල මිනිසුන්ගේ මනසට නිරන්තරයෙන් කාවද්දන්න යන්නේ කුමක්ද? පිටසක්වල දියුණු ජීවින් සමඟ එක්ව ගොඩ නඟා ගත් අති දියුණු තාක්ෂණයක් ඔවුනට ඇති බව නොවේද? ඊට අප බිය යුතු බව නොවේද?

රාජිත සහ එස්.බී. ගේ අවස්ථාවාදී දේශපාලන ඉතිහාසය

වර්තමාන ආණ්ඩුවේ අමාත්‍යවරුන් දෙපළක් වන රාජිත සේනාරත්න සහ එස්.බී. දිසානායක දෙදෙනාගේ සමානකම් බොහොමයක් තිබේ. දෙදෙනාම විශ්ව විද්‍යාලයෙන් දේශපාලන ජීවිත ආරම්භ කළේ වාමාංශිකයන් ශිෂ්‍ය නායකයන් ලෙසයි. දෙදෙනාම දක්ෂ කථිකයයෝ ය.

රාජිත සේනාරත්න

රාජිත සේනාරත්න විශ්ව විද්‍යාලයේ ශීෂ්‍ය දේශපාලනයෙන් පසු විජය කුමාරණතුංග ගේ ශ්‍රීලංකා මහජන පක්ෂයට එක් වූයේ ය. (විජය කුමාරණතුංග 1984 දී ශ්‍රීලංකා මහජන පක්ෂය පිහිටුවන ලද්දේ ශ්‍රීලංකා නිදහස් පක්ෂෙයෙන් වෙන් වී යාමෙනි.) 1987 දී සිදු වූ විජයගේ අකල් මරණයෙක් පසු පක්ෂයේ නායකත්වය දැරූ ඔසී අබේගුණසේකර එක්සත් ජාතික පක්ෂයට හිතවත් ස්ථාවරයකට දැක් වූයේය. (ඔසී අබේගුණසේකර මිය ගියේද එජාප වේදිකාවක සිටියදී බෝම්බයකට හසු වීමෙනි.) ඔසී ගේ එජාප හිතවාදී ප්‍රතිපත්තියට විරුද්ධ වූ රාජිත සේනාරත්න විජයගේ වැන්දඹු බිරිඳ වූ චන්ද්‍රිකා බණ්ඩාරනායක සමඟ එක් ව බහුජන නිදහස් පෙරමුණ නම් අළුත් පක්ෂයක් පිහිටුවා ගැනීමට මූලික වූයේය.

නමුත් කෙටි කලකින් රාජිත සහ චන්ද්‍රිකා අතර ප්‍රබල ගැටුමක් වර්ධනය විය. චන්ද්‍රිකා බහුජන නිදහස් පෙරමුණ අතහැර ශ්‍රිලනිපයට එක් වී එහි බලය අල්ලා ගත්තා ය. රාජිත ඊට ප්‍රතිවිරුද්ධ මඟ ගොස් එජාපයට එක් වූයේ ය. චන්ද්‍රිකා 1994 දී ශ්‍රිලනිප ආණ්ඩුවක් පිහිට වූ අතර ඇගේ පාලන සමයේදී ඇයට එරෙහි කර්කශම විවේචකයා වූයේ රාජිත සේනාරත්න ය. ඒ හේතුව නිසා මන්ත්‍රී ධූරයේ සිටියදී කරන ලද අක්‍රමිකතාවක් පාදක කරගෙන ඔහුගේ මන්ත්‍රී ධූරය අහෝසි කර දැමීමට චන්ද්‍රිකා කටයුතු කළා ය. කෙසේ නමුත් එජාප නායකත්වය ඔහුව නැවත වරක් ජාතික ලැයිස්තුවෙන් පාර්ලිමේන්තුවට පත් කළේ ය.

නමුත් රාජිතගේ එජාප දීගයද සුබදායක වූයේ නැත. 2001 දී රනිල් වික්‍රමසිංහ ආණ්ඩුවක් පිහිටුවීමට සමත් වූ නමුත් රාජිතට එහි ප්‍රබල ඇමති ධූරයක් ලැබුනේ නැත. දිගින් දිගටම රූපවාහිනි විවාද වලට එක්වෙමින් රනිල්ගේ ආණ්ඩුවේ දේශද්‍රෝහි ගමන්මඟ ආරක්ෂා කිරීමට ඔහු කටයුතු කළද (මේ නිසා “රූපවහිනි විවාද ඇමති” යන නම ඔහුට පටබැඳිණි.) රනිල්ගෙන් ඔහුට ලැබුනේ කුඩම්මාගේ සැලකිලිය.එසේ වුවද, රාජිත 2005 ජනාධිපතිවරණ වේදිකාවේදීත්, ශ්‍රිලනිප අපේක්ෂකයා වූ මහින්ද රාජපක්ෂට විරුද්ධව කෑ ගැසුවේය.

2005දී,  මහින්ද ජනාධිපතිවරණය ජයගත් පසු, රනිල් යටතේ තමන්ට වූ කෙනහිලි කම් වල පීඩනය පිට කළ රාජිත, රනිල්ට පහර පිට පහර ගසමින් තවත් පිරිසක් සමඟ මහින්දගේ ආණ්ඩුවට එක් විය. ඉන්පසු රාජිත 2005 සිට 2014 දක්වාම මහින්දගේ ආණ්ඩුවේ කැබිනට් ඇමතිකම් දැරූ අතර, 80 සහ 90 දශකවල තමන් දැරූ බෙදුම්වාදී ප්‍රතිපත්තිවලට එරෙහිව යමින්, කොටි ත්‍රස්තවාදයට එරෙහි මහින්දගේ ආණ්ඩුවේ හමුදා මෙහෙයුම් ඉහළින් වර්ණනා කළේය.

කෙසේ නමුත් 2010න් පසු යම් යම් හේතු නිසා මහින්ද රාජපක්ෂ සමඟද කළ කිරුණු  රාජිත එම ආණ්ඩුව බිඳ දැමීමට කරන ලද අභ්‍යන්තර කුමන්ත්‍රණයට ප්‍රබල දායකත්වයක් හොර රහසේ දැරීය.  ඒ සඳහා එතෙක් තමන්ගේ දේශපාලන ගමනට අකුල් හෙලු, තමන්ගේ දේශපාලන විරුද්ධවාදීන් වූ, චන්ද්‍රිකා සහ රනිල් සමඟ  එක්ව කටයුතු කිරීමට ඔහු නිර්ලජ්ජිත විය. රාජිත ගේ පුත්‍රයාද ඒ සඳහා ඔහුට සහාය වූයේ ය. දැන් ඔහු මේ අසමත් ආණ්ඩුවේ ඇමති ධූරයක් දරමින් මහින්ද රාජපක්ෂගේ දේශපාලන ආගමනයට වල කපමින් සිටියි.

එස්.බී. දිසානායක

එස්.බී. දිසානායකද රාජිත මෙන්ම විශ්ව විද්‍යාල සිසුවකු ලෙස වාමාංශික ශිෂ්‍ය දේශපාලනට යොමුව නායකත්වය දැරූ අයෙකි. විශ්ව විද්‍යාලයෙන් පිට වූ පසු ඔහු ශ්‍රීලංකා නිදහස් පක්ෂය හා එක් වූ ඔහු ක්‍රියාකාරි දේශපාලනයට පිවිසියේ ය. 80 දශකය වන විට ශ්‍රීලනිප නායකත්වය දැරුවේ සිරිමා බණ්ඩාරනායක මැතිණිය වූ අතර ඇගේ අනුප්‍රාප්තිකයා ලෙස පක්ෂ නායකත්වයට පත් වීමට සිටියේ එවකට පාර්ලිමේන්තුවේ විපක්ෂ නායක ධුරයද දැරු ඇගේ පුත්‍රයා වූ අනුර බණ්ඩාරනායකයි. කෙසේ වුවත් එස්.බී. දිසානායක සහාය දැක් වූයේ ඔවුන් දෙදෙනාටම නොව චන්ද්‍රිකා බණ්ඩාරනායකටයි. මුල් වකවානුව වන විට චන්ද්‍රිකාට සහාය දීමට සිටියේ එස්.බී. හැරුණු විට මංගල සමරවීර සහ තව කිහිපදෙනෙක් පමණි.

චන්ද්‍රිකාගේ දේශපාලන ආගමනයට විශාල කැපවීමක් කළ එස්.බී. 1994 බිහි වූ චන්ද්‍රිකාගේ ආණ්ඩුවේ ප්‍රබල කැබිනට් ධුරයක් දැරී ය. කෙසේ වුවත් පසු කලෙක චන්ද්‍රිකා සමඟ ප්‍රබල ගැටුමක් වර්ධනය කරගත් ඔහු චන්ද්‍රිකා ගේ කර්කශම විවේචකයකු වූයේ ය. පෙරළා චන්ද්‍රිකා ඔහුට පහර දෙන ප්‍රතිපත්තියක් අනුගමනය කළා ය. එලෙස 2001 දී චන්ද්‍රිකාගේ ආණ්ඩුවෙන් තවත් පිරිසක් සමඟ වෙන් වූ ඔහු එජාපයට එක් වූයේය. මේ හේතුව නිසාම චන්ද්‍රිකාගේ ආණ්ඩුව බිඳ වැටුණ අතර 2001 පැවති මහ මැතිවරණයෙන් ඇයව පරදා රනිල් වික්‍රමසිංහ අගමැති ධූරයට පත් වූයේය.

කෙසේ වුවත් 2001 රනිල්ගේ ආණ්ඩුවෙන්ද ඔහුට ලැබුණේ කුඩම්මාගේ සැලකිලිය. 2001 එජාප ආණ්ඩුව පිහිටුවීමට තීරණාත්මක කාර්යභාරයක් ඉටු කළද ඔහුට බලාපොරොත්තු වූ ප්‍රබල භුමිකාවක් ඔහුට එම ආණ්ඩුව තුළ ලැබුනේ නැත. ඔහු එජාපය තුළ සිටියේ කළ කිරුණු ස්වභාවයකිනි. 2004 දී චන්ද්‍රිකා නැවත බලයට පැමිණි අතර ඇය එස්.බී. ව වසර දෙකක සිර දඬුවමකට ලක් කිරීමට වග බලා ගත්තාය.

2005 දී මහින්ද රාජපක්ෂ බලයට පැමිණි අතර මඳ කලකින් ඔහු එස්.බී. දිසානාකගේ දඬුවම් කාලය අඩු කර නියමිත කාලයට පෙර හිරෙන් නිදහස් කළේ ය. හිරෙන් නිදහස්ව එජාපය සමඟ තව දුරටත් සිටි එස්.බී. 2009 හමුදා මෙහෙයුම් අවසන් වන තුරුත් සිටියේ එජාප යේය. 2010 ජනාධිපතිවරණයට මඳ කලකට පෙර ඔහු එජාපයෙන් ඉවත් වී මහින්ද රාජපක්ෂ සමඟ එක් වූයේය. ඉන්පසු මහින්ද රාජපක්ෂ ආණ්ඩුවේ කැබිනට් ඇමති ධූරයක් දැරුවේය. 2015 ජනාධිපතිවරණයෙන් මහින්ද පැරදුනු පසු මහින්දව අත් හළ එස්.බී. මෛත්‍රිපාල සිරිසේන ගේ ආණ්ඩුවට එක් ව කැබිනට් ඇමති ධූරයක් ලබා ගත්තේය. මහින්දට එරෙහිව පොත් පිංචක්ද මුද්‍රණය කර පක්ෂ සාමාජිකයන් අතරේ බෙදා හළ එස්.බී., අද මහින්දගේ දේශපාලන ආගමනට අකුල් හෙළන ප්‍රධාන චරිතයකි. ඒ සඳහා ඔහු අත් වැල් බැඳගෙන ඉන්නේ තමන්ට කෙනහිලිකම් කළ තමන්ව හිරේ විලංගුවේ පවා දැමීමට කටයුතු චන්ද්‍රිකා සහ රනිල් වැනි පුද්ගලයන් සමඟයි.

 

Capture

 

 

 

 

ප්‍රජාතන්ත්‍රවාදය අපට ජීර්ණය වේද?

වර්තමාන ප්‍රජාතන්ත්‍රවාදය යනු නූතනත්වයේ ලක්ෂණයක් ලෙස සැලකිය හැක. එය 15වන සියවසින් පසු යුරෝපයේ ඇති වූ නූතනත්ව චින්තන පෙරළිය සමඟ ඇති වූ බටහිර විද්‍යාව, ධනපති ක්‍රමය ඇතුළු තවත් බොහෝ දේ මෙන් තවත් එකකි. පුරාතන ග්‍රීසියේ මෙන්ම ඉන්දියාවේ ලිච්ඡවීන්, මල්ලයන් වැන්නන් අතරද ප්‍රජාතන්ත්‍රවාදී දේශපාලන ක්‍රමයන් තිබූ නමුත් අද පවතින ප්‍රජාතන්ත්‍රවාදී ක්‍රමය ඒවායේ සිට අඛණ්ඩව විකාශය වූවක් ලෙස සැලකිය නොහැක.

වර්තමාන ප්‍රජාතන්ත්‍රවාදය මධ්‍යතන යුගයේ අවසාන භාගයේ සිට යුරෝපයේ විකාශය වූවක් ලෙස සැලකීම වඩා සාධාරණය. විශේෂයෙන් අප වැනි රටවල් අනුගමනය කරන බ්‍රිතාන්‍යයේ වෙස්මිනිස්ටර් ප්‍රජාතන්ත්‍රවාදී ව්‍යුහය 1215 මැග්නා-කාර්ටා ගිවිසුම සහ ඉන් පසු එංගලන්තයේ ඇති වූ විවිධ දේශපාලන තත්වයන්ට අනුරූපව වර්ධනය වූවක් ලෙස සැලකිය හැක. යුරෝපයේ වෙනත් රටවල්ද සමගාමී ලෙස පැරණි රාජාණ්ඩු ක්‍රමයන්ගේ සිට ප්‍රජාතන්ත්‍රවාදී පාලන ක්‍රමයන්ට ක්‍රමානුකූලව පරිනාමය වූ අතර මේ සියල්ල යුරෝපයේ ඇති වූ නූතනත්ව චින්තන පෙරළියේ ප්‍රතිඵලයක් ලෙස සැලකිය හැක.

යුරෝපීයයෝ ඉන්පසු ලෝකය ආක්‍රමණය කළ අතර ලෝකයේ රටවල් බහුතරය තම දේශපාලන ආධිපත්‍යයට නතු කර ගත්හ. ඉන්පසු ඔවුන්ගේ රටවල ක්‍රමිකව විකාශය වෙමින් පැවති ප්‍රජාතන්ත්‍රවාදී පාලන ක්‍රමයන් අප වැනි රටවලට ආදේශ කළහ. යුරෝපය හැරෙන්නට ලෝකයේ වෙනත් රටවල නූතනත්ව චින්තන පෙරළියක් සිදු වූයේ නැත. ඒ රටවල රාජාණ්ඩු වැනි විවිධාකාර පාලන ක්‍රමයන් පැවතිණ. ප්‍රජාතන්තරවාදය බලෙන් පැටවූවක් විය. නමුත් යුරෝපයේ ප්‍රජාතන්ත්‍රවාදය, සමාජය තුළම ඇත් වූ නූතනත්ව චින්තන පෙරළියත් සමඟ ක්‍රමිකව පරිනාමය වූවකි.

මේ වෙනස අදටත් දැක ගත හැක. බටහිර රටවල් අද නූතන ප්‍රජාතන්ත්‍රවාදයේ වඩාත් විකාශය වූ තැනක සිටිති. බටහිර රටවල රාජ්‍ය නායකයා, පැරණි රජුගේ සංකල්පයෙන් සෑහෙන ඈතට යමින් සාමාන්‍ය පුරවැසියා දක්වා ගමන් කරමින් තිබේ. උදාහරණයක් වශයෙන් බ්‍රිතාන්‍යයේ අගමැතිවරයා දුම්‍රියේ පුවත්පතක් බලමින් ගමන් කිරීම සාමාන්‍ය දෙයකි. පුරවැසියා ඔහුව අමතනේ “මිස්ටර් කැමරන්” ලෙසයි. රාජ්‍ය නායකත්වය යනු හුදු රැකියාවකි. නිලකාලය අවසන් වූ පසු ඔවුහු ඉතාම සාමාන්‍ය පුරවැසියන් බවට පත් වෙති.

නමුත් අප වැනි රටවලට බටහිර ප්‍රජාතන්ත්‍රවාදය පූර්ණව ජීර්ණය වී නොමැත. අප වැනි රටවල පුරවැසියා තුළ රාජ්‍ය නායකයා යන සංකල්පය ලබා ගන්නේ රජු යන සංකල්පය හරහාය. වෙන විදියකින් කිවතොත් රාජ්‍ය නායකයා ඔවුන් දකින්නේ රජෙක් ලෙසයි. ඔවුන්ට අවශ්‍ය රජ කෙනෙකි. මේ තත්වය ලංකාව වැනි ආසියානු රටවලද, අප්‍රිකාවේ, මැද පෙරදිග ද දැකිය හැක. මහතීර් මොහම්ඩ්,  ලී ක්වාන් යූ, රොබට් මුගාබේ, සදාම් හුසේන් වැනි ප්‍රජාතන්ත්‍රවාදී ක්‍රමයන් ඔස්සේ බලයට පත් වූ පත් වූ රාජ්‍ය නායකයන්ද සංකල්පීයව රජවරුන් ලෙස සැලකිය හැක.

මහින්ද රාජපක්ෂ වැනි චරිතයක් කෙරෙහි විශේෂයෙන් අපේ රටේ ගම්වැසියන්ගේ ආදරය අදටත් නොඅඩුව පවතින්නේ මහින්ද රාජපක්ෂ රජෙකුගේ ප්‍රතිරූපයට වඩාත් ගැලපෙන පෞරුෂයකින් හෙබි තැනැත්තෙක් නිසාය.

නූතනත්ව චින්තන පෙරළිය සිදු නොවූ අප වැනි රටවල ප්‍රජාතන්ත්‍රවාදය සදාකල්ම පවතින්නේ විකෘතියක් ලෙසයි.

සිරිසේනගේ ඉරණම

මහින්ද රාජපක්ෂට කැමති විශාල ජන පිරිසක් අපේ රටේ ඇත. රනිල් වික්‍රමසිංහට කැමති තවත් විශාල ජන පිරිසක් අපේ රටේ ඇත. නමුත් මෛත්‍රිපාල සිරිසේනට කැමති ජන පිරිස අල්පය. මෛත්‍රිපාල සිරිසේන යනු පැවති ශක්තිමත් ශ්‍රිලනිප ආණ්ඩුව බිඳ වැට්ටවීමට කටයුතු කළ පුද්ගලයාය. ඒ නිසා ශ්‍රිලනිප හිතවාදීන්ට ඔහුව පෙනෙන්නේ ද්‍රෝහියෙක් ලෙසයි. එජාප හිතවාදීන් මෛත්‍රිපාල සිරිසේනට යම් කිසි කැමැත්තක් මුලදී තිබ්බත් දැන් එය ක්‍රමයෙන් ක්ෂය වී යයි. ඔවුන් මුලදී මෛත්‍රිපාල සිරිසේනව වැළඳ ගත්තේ පැවති ශක්තිමත් ශ්‍රිලනිප ආණ්ඩුව බිඳ දැමීමට උපකාර වූ තැනැත්තා නිසා ය. එහෙත් ඔවුන්ගේ සැබෑ ඇල්ම ඇත්තේ රනිල් වික්‍රමසිංහටයි. ස්වභාවයෙන්ම බටහිර අනුකාරක මනස් සහිත එජාප හිතවාදීන් (බහුතරය) ගේ මන්දොළ සපුරන්නේ ටයිකෝට් ඇඳගෙන, ඉංගිරිසි හොඳට කතා කරන උගත් මිස්ටර් වික්‍රමසිංහය. සිරිසේන පොළොන්නරුව පැත්තේ අට පාස් මෝඩ ගමරාළ කෙනෙකි. අවසාන අර්ථයෙන් එජාප හිතවාදීන් මෛත්‍රිපාල සිරිසේනව දකින්නේ එලෙසයි.

දැන් මෛත්‍රිපාල සිරිසේන ව ජන සමාජයේ දැඩි උපහාස අපහාසයට සහ විවේචනයට බඳුන් වේ. මෛත්‍රිපාල සිරිසේන බලයට ගෙන ඒමට දර දිය ඇද්ද ඇතැම් පිරිස් ද, විශේෂයෙන් ඊනිව්ස්, කොලොම්බොටෙලිග්‍රාප් වැනි මාධ්‍ය සහ විවිධ සමාජ චරිත, මේ වන විට මෛත්‍රිපාල සිරිසේන ට දිගට හරහට නෙළීමට පටන් ගෙන ඇත.

කෙදිනක හෝ එජාප ශ්‍රිලනිප දීගය අවසන් වන අතර ඉන් පසු මෛත්‍රිපාල සිරිසේන නැත්තටම නැතිවන තුරු දෙපැත්තෙන්ම කන්න ලැබෙනු ඇත. කෙදිනක හෝ ජනාධිපති ධූරයෙන් සමුගත් පසු ඔහු, චන්ද්‍රිකා කුමාරණතුංග, සරත් ෆොන්සේකා වැනි හුදු අවලංගු කාසියක් බවට පත් වනු ඇත. මෛත්‍රිපාල සිරිසේන ත් චන්ද්‍රිකා, ෆොන්සේකා වැනිම තමන් හිටපු තැනට ද්‍රෝහි වුන කෙනෙකි.

සිංහල බෞද්ධ කියන්න බය ඇයි?

ඉකුත් වසරේ රාජපක්ෂ ආණ්ඩුව පරාජය වීමෙන් වුන තවත් වින්නැහියක් නම්, “රාජපක්ෂ ආණ්ඩුව පරාජය වීමට හේතුව මුස්ලිම් සහ දෙමළ ඡන්ද අහිමි වීමය. ඒකට හේතුව රාජපක්ෂ ආණ්ඩුව සිංහල බෞද්ධ කියන එක ඔනෑවට වඩා අවධාරණය කළ නිසාය” කියන කතාවයි. වර්තමානයේ පුන පුනා මේ කතාව කියනු ඇසේ. මේ පිරිස කියන්නේ අපේ රට ශ්‍රීලංකාව බවත්, විවිධ ජාතීන් මෙහි ජීවත් වන බවත්, ඒ සියලු ජාතීන් අතර සමගිය වඩා ජාතික සමගිය දියුනු කළ යුතු බවත් ය. දැන් මේ පිරිස මේක කියන්නේ රාජපක්ෂ කඳවුර ඇතුළේ ඉඳන් වීම ලොකුම වින්නැහියයි.

මේ පිරිස රාජපක්ෂ ආණ්ඩුවට සහාය දෙන්නේ හුදෙක් නිල් පාට පාක්ෂික විඥාණයක් හිමි වීම නිසා පමණි. අපි දස වසක රාජපක්ෂ පාලන සමය දකින්නේ වසර දහස් ගණනක් මෙරට පැවති සම්ප්‍රදාය, බටහිරයන් විසින් වනසා දැමූ ඒ සිංහල බෞද්ධ සම්ප්‍රදාය, වසර දෙසීයකට පමණ පසු නැවත මතු වෙමින් ආ යුගයක් ලෙසය. අපට මහින්ද රාජපක්ෂ වටින්නේ ඒ නිසාය. නමුත් රාජපක්ෂ කඳවුරේ සිටින ඇතැමුන්ට එය එතරම් වැදගත් නැත. ඔවුන්ට මහින්ද රාජපක්ෂ වටින්නේ හුදෙක් ඔවුන් ප්‍රිය කරන පක්ෂය සවිමත් තැනකට ගෙන ආ නායකයා වීම නිසා පමණි.

පවතින දේශපාලන සන්දර්භය තුළ දෙමළ සහ මුස්ලිම් ඡන්ද මහින්ද රාජපක්ෂ හෝ ඔහු නියෝජනය කරන ජාතිකත්ව කඳවුරට වැඩි වශයෙන් ආකර්ෂණය කර ගත නොහැක. එය නිශ්ඵල උත්සාහයක් වන අතර එවැන්නක් අවශ්‍යද නොවේ.

වර්තමාන සන්දර්භය තුල දෙමළ සහ මුස්ලිම් ඡන්ද, දෙමළ සහ මුස්ලිම් වාර්ගික දේශපාලනය විසින් ගිලගෙන ඇත. දෙමළ සහ මුස්ලිම් දේශපාලනය ක්‍රියා කරන්නේ ඉහළ සිට පහළටය. උතුරේත්, වතුකරයේත් දෙමළ ඡන්ද පදනම දෙමළ වර්ගවාදී පක්ෂ කිහිපයක් විසින් හසුරවයි. රට පුරා මුස්ලිම් ඡන්ද පදනම මුස්ලිම් පල්ලිය හරහා මුස්ලිම් වර්ගවාදී දේශපාලකයන් කිහිප දෙනෙක් විසින් හසුරවයි. ඒ නිසා ඉහළින් තිබෙන දෙමළ සහ මුස්ලිම් වාර්ගික දේශපාලනය දේශපාලන උපක්‍රම මඟින් පරාජය නොකර, පහළින් සිටින දෙමළ හෝ මුස්ලිම් මිනිසා තමන් වෙත දිනා ගත හැකි යැයි සිතීම මැටි මෝල් කමකි. ඇතැම් ජාතිකවාදීන්ද එසේ සිතා සිටින බව පෙනේ.

කළ යුත්තේ ජාතිකත්ව කඳවුරට පහසුවෙන් ආකර්ෂණය කර ගත හැකි සිංහල බෞද්ධ ඡන්ද වැඩියෙන් ආකර්ෂණය කර ගැනීමයි. එය අපහසු වැඩක් නොවේ. ඉන් පසු දෙමළ සහ මුස්ලිම් වර්ගවාදී දේශපාලනය දිය කර හැරිය යුතුය. එය කළ හැක්කේ සිංහල බෞද්ධ ජාතිකත්ව දේශපාලනය ශක්ත්මත් කිරීම මඟිනි.